Share Your Story

Read about other people’s experience of learning and speaking reo Māori – or contribute your own experiences and thoughts.

Tukuna mai ngā kōrero mōu

Pānuitia ngā kōrero pono a ētahi atu mō te ako ki te kōrero me te kawe i te reo Māori - tukuna rānei ō ake kōrero pono me ō ake whakaaro.

 

Te Rōpū Reo MāoriMāori Language Club
Pānui #5 – Paengawhāwhā 2012

Tēnā koe!

Ngā mihi maioha i runga i ngā āhuatanga o te wā ki a tātou katoa  

Arohatia te Reo

 



TE WIKI O TE REO MĀORI - 23-29 Hōngongoi 2012
Ko Arohatia te Reo te kupu kua whakarewahia hei tāhuhu mō Te Wiki o te Reo Māori i tēnei tau, e mea ana kia kaha tā tātou rauhī, tā tātou maimoa i te reo. Ko te wawata, kia kitea e tēnā, e tēnā he mahi, he ara e whakaatu ai ia i tōna aroha ki te reo. Ahakoa ko wai, ahakoa nō whea, ahakoa kei whea e noho ana, e mahi ana, tēnei Te Taura Whiri te whakatenatena nei i te motu whānui kia hāpai ake i te kaupapa nei. Kimihia he kaupapa hei poipoi, hei whakanui, hei kōrero i te reo, kia eke ai te kōrero, āe mārika, e arohatia ana tō tātou reo Māori. 

 

Launch

 

 

 

 

 

 

 

 

 

Te Whakaterenga o Te Wiki o te Reo Māori
Mehemea kei te takiwā o Te Awa koe, i Kirikiriroa, i te 8.30 i te ata o te Mane te 23 o Hōngongoi, kei reira mātou e whakatere ana i Te Wiki o te Reo Māori. Ko ētahi kura o te rohe kei te kawe i ngā mahi whakaharakoa, ka tū he pae whakatairanga, hokohoko, ka tohaina anō he kai utukore hei timotimo mā tātou. Ka riro mā ōna anō tiketike o te kāwanatanga me Tainui e āta whakatuwhera Te Wiki. Nau mai, haere mai ki te timotimo – i te kai, i te mahi a te rēhia, i ngā rauemi anō hoki e horahia ana i tēnei wiki hei whakanui i tō tātou reo Māori.


Ngā rauemi reo Māori
Katoa ngā rauemi e mahia ana e Te Taura Whiri i te Reo Māori mō te tau 2012, ka wātea kia tīkina i te ipurangi ā te 1 Pipiri 2012. Heoi anō tāu, he toro i te http://www.korero.maori.nz/resources, ka tango mai ai i reira.

NGĀ TOHU REO MĀORI
Ka huaki ngā Tohu Reo Māori
Hei te 1 Pipiri 2012 ka tuwhera Ngā Tohu Reo Māori. Me tīmata pea ināianei te whiriwhiri he aha he mahi mā tō whakahaere hei whakanui i Te Wiki i te Reo Māori ka tahi, e uru ai koutou ki Ngā Tohu Reo Māori ka rua. Arā tētahi puna whakaaro, ko ngā mahi kua mahia e ētahi atu i ngā tau kua mahue ake, kei te http://www.korero.maori.nz/news/press .

 Dinner


 

 

 

 

 

 

 

 

 

 

Te hākari whakanui i Ngā Tohu Reo Māori
Ka tū Ngā Tohu Reo Māori 2012 ā te Paraire te 16 o Whiringa-ā-rangi, ki te Whare TECT, i Baypark, Tauranga.
Hei te Whiringa-ā-nuku tīmata ai te hoko o ngā tīkiti (me whakapā mai ki a Catherine Sinclair – tau waea 04 471 6730; īmēra catherine@tetaurawhiri.govt.nz).

Ma Te Reo

 

 

 

Ko Mā te Reo anō tētahi tino kaupapa ka tuwhera i te rā tuatahi o Te Wiki o te Reo Māori, arā, i te Mane, te 23 o Hōngongoi 2012. Kei te haere ake te kāhui mahi o Mā te Reo ki te whakatuwheratanga o Te Wiki o te Reo Māori, ki te kawe akoranga e mōhio ake ai te iwi me pēwhea te tuhi tono pūtea tērā tonu e waimarie, he aha ngā momo kaupapa ka kaha tautokona, ā, he aha katoa ngā momo kōrero me mātua tāpiri ki te tono. Ka whaihua tonu pea te toro i te pae tukutuku, http://www.ma-tereo.co.nz / ki te tirotiro i ngā kaupapa i tautokona i mua atu, te patu waea rānei ki te 0800 MA TE REO ki te kimi pārongo atu anō.

Anniversary

 

 

 

 

 

 

 

TE EKENGA O TE 25 TAU E TŪ ANA TE TAURA WHIRI I TE REO MĀORI
Hei tēnei tau, hei te 1 Hereturikōkā 2012, ka whakanuia te 25 tau e tū ana Te Taura Whiri i te Reo Māori. Whāia ngā kōrero mō tēnei kaupapa i te PukaMata, tae atu ki tētahi rāranga wā e whakaatu ana i ētahi āhuatanga nui kua pā i roto i ēnei tau e 25.
Facebook Icon

 Te Taura Whiri i te Reo Māori

 

Shakespeare

 

 

 

 

 

TE RŪRŪTAO KI TE REO MĀORI
A Toroihi rāua ko Kāhiwa (The Māori Troilus and Cressida)
Ko Rawiri Paratene (o Whale Rider) tētahi o ngā kairangi 18 e whakatinana ana i te whakaari nei i te atamira, tae atu ki a Waihoroi Shortland (o Boy, nā Taika Waititi) me te Ahorangi o Te Reo, a Scotty Morrison (o Te Karere). He whakaari whakahirahira tonu tēnei, A Toroihi rāua ko Kāhiwa, hei kai mā te mata, hei kai anō mā te taringa. I hikina tuatahitia ki Pōneke, ki Tāmaki, ā, taihoa ka kawea ki Rānana, ki te whare whakaari porotaka e mōhiotia nei ko te Globe, hei wāhanga nō te Taiopenga o Rūrūtao ki te Ao, tae atu ki te Taiopenga o Rānana 2012. Ko ēnei kaupapa e rua, he whakanui mātārere mō Ngā Taumāhekeheke o te Ao. Ka whakaaritia A Toroihi rāua ko Kāhiwa ki te Globe ā te 23-24 Paengawhāwhā 2012.

HE RAUEMI REO MĀORI
www.koreromaori.co.nz – e pai ana ahakoa pēwhea rawa te matatau o te tangata
www.cultureflow.co.nz - he rauemi ako i te reo Māori, ko koe tonu tō kaiwhakataki
www.maorilanguage.net - he kiriata e kitea ai te kupu, e rangona ai me pēwhea te whakahua
www.huia.co.nz - ā rātou tānga reo Māori
www.maori.org.nz - he tākaro, he pangahono reo Māori, tae atu ki ētahi pārongo mō te reo me ngā tikanga Māori
www.nzdl.org/cgi-bin/library - he nūpepa Māori nō tērā rautau me te tīmtatanga o tēnei rautau
www.nzhistory.net.nz - ētahi kupu Māori 100 nei ka auau te puta ake, hei whakarongo atu māu, hei whakawaiwai māu
www.reed.co.nz/search.cfm - te rātou rārangi pukapuka tuihono
www.toitekupu.org.nz - he rauemi reo Māori kua whakaemitia e te tari Māori o Te Kunenga ki Pūrehuroa.
www.reddfish.co.nz - he pūmanawa rorohiko mahi tohutō
www.kotahimanokaika.com/library/lit/index.html - hei tā mai i ngā PDF o ētahi tuhinga reo Māori