This countdown requires you to have the latest Flash player - you can download it here.

He aha te kupu e kimi ana koe i te ī-papakupu?

 
Te āhua o ngā kōrero ka takoto: poto    roa



waka

1. [Tāne] ing. He kahiwi rākau kua waimanutia, kia mānu ai i te mata o te wai, e haere ai ka hoea ki te hoe. Ka oti ngā waka rā te waihanga, ka tōia ki waho mānu ai (W 478). {tōtara}

waka kōtore-puni [Tāne] He waka ka oti katoa te hanga ki te kahiwi kotahi, arā, kāore ōna haumi.  kōtore (kōtore puni)

waka pītau [Tāne] He waka taua kua whakairohia te tauihu ki te pītau. Ko te waka rongonui o tēnei motu, te 'waka pītau' o te iwi Māori (WM 1, 5).  pītau1 (4)

waka taua [Tāne] He waka nui hei mau i te taua. Ka ohorere te iwi hī ika i te putanga atu o te waka taua (IwiT 9:13). {pīnaku, toiera, toiere1}

2. [Tāne] He paepae āhua whāiti, he roa tonu, hei pupuri i te wai, i te taonga, i te tūpāpaku, i te aha atu. Ka mate tēnei tangata, ka whaongia ki te waka raupō (W 478).

waka huia [Tāne] He pouaka whakairo hei putunga rau huia, hei putunga taonga rānei. Ko te taonga mā Pirinihehe ana he waka huia, pērā me te papahou, engari he paku iho (Wh 19, 3). {papa2 (papa hou), papa2 (papa huia)}

waka tūpāpaku [Tāne] He pouaka hei nehu, hei tahu rānei i te tūpāpaku. I te nehunga, ka pīkautia mā te waka tūpāpaku ki Mātaikona (TTR 1, 251).  kāwhena

3. [Tāne] He kupu whānui mō ngā mea ka āta hangaia hei kawe i te tāngata, i te utanga, i te aha atu, ka haere i te moana, i te whenua, i te rangi rānei. (i) I rere mai koe mā runga waka rererangi, i taraiwa mai rānei mā runga waka rīhi? (ii) Ko te reo te waka kawe i te whakaaro o te tangata.

waka rererangi [Tāne] He waka whai pūkaha, whai pākau ka rere i te rangi. Ka tau atu te waka rererangi ki Te Whanga-nui-a-Tara mō te hāwhe hāora, kātahi ka rere ki Ōtautahi. {eropereina}

4. [Tāne] He pūrere haere whenua, he whai pūkaha, e whā ngā wīra, he kawe i te tokoiti tāna mahi. (i) Kua piri ngā pānui kauā tētahi waka e haere mā runga i tēnei piriti, kei te ngoikore (HP 288). (ii) Ko te pai o tōku waka he māmā ki te taraiwa, kāore e kaha ki te kai hinu. {motokā, motukā}

5. [Tūmatauenga] Te katoa o ngā kaihoe, ngā kaimahi rānei o runga i tētahi waka. E rotua ana e Rua te waka rā kia moe tonu (W 478).  hoe (hoe waka)

6. [Tūmatauenga] He tangata, he aha atu ko ia te huarahi, te reo, te ringaringa, te tinana rānei o tētahi wairua, o tētahi atua. Whakaeke kau ana a Hākawau ki te pā o te waka o aua atua, ka kitea e haere atu ana te waka o ēnei atua (W 478).  kaupapa (8)

7. [Tāne] He kāhui manu. (i) Me he waka tīeke e wāua mai nei e te ruru (W 478). (ii) He waka kuaka (W 478).