This countdown requires you to have the latest Flash player - you can download it here.

He aha te kupu e kimi ana koe i te ī-papakupu?

 
Te āhua o ngā kōrero ka takoto: poto    roa



toitoi1

1. [Ranginui] ing. Te wāhi whakarunga rawa (o tētahi mea pērā i te maunga, te rākau, te taputapu, te kaupapa, te aha atu). (i) I noho ā-kāinga noa iho ai ngā iwi Māori, i mutu ai te noho i ngā pā, i ngā toitoi o ngā pukepuke (Wa 4, 3). (ii) Kua tikoina te toitoi o te whakapakoko e te manu.  tihi (1)

2. [Tangaroa] He ika wai māori 15-24 henemita te tipu. Gobiomorphus gobioides.  kōkopu (3)

3. [Tangaroa] He ika wai māori 10 henemita te tipu. Gobiomorphus cotidianus.  tīpokopoko (2)

4. [Tangaroa] He ika wai māori e 8 henemita te tupu. Gobiomorphus huttoni.  kopu (3)

5. [Tangaroa] He mātaitai pōtaka pūhuki te hanga. Cookia sulcata.  kāeo (1)

6. [Tangaroa] He mātaitai tōrino te hanga. Buccinulum sp.  huamutu1

7. [Tangaroa] He mātaitai pōtaka pūhuki te hanga. Astraea heliotropium.  ripo matamata

8. [Tāne] He manu iti noho wao, noho ururua. Petroica macrocephala toitoi.  miromiro (1)

9. [Tāne] He manu iti noho ngahere, noho ururua. Petroica australis.  toutouwai

10. [Tāne] He manu noho pātītī taranui, noho māheuheu, noho raupō me ērā momo wāhi. Bowdleria punctata.  mātātā2 (1)

11. [Tāne] He manu noho ngahere, noho mōheuheu. Mohoua novaezealandiae.  pīpipi (3)

12. [Tāne] He momo harakeke. Phormium tenax.

toitoi2

1. ‑nga ‑tanga [Tāwhirimātea] mahp, ing, āhua. Ka āhua tere tonu te haere, arā, ka tere ake i te hīkoi, engari kāore i oma rawa. (i) 'E kui, tino tere koe ki te kawe wai mai.' 'Āe e moko, toitoi tonu taku haere' (Wh 53, 2). (ii) Ka tīmata ki te ngangahu, me te whiu tika i tōna taiaha, me te hūpekepeke a ōna waewae. Ehara, kua heke haere i ngā turi, kua huri kua toitoi haere atu (HP 84). (iii) Ka whakangete i tana kuia hōiho me te paku whakakipakipa anō, ehara, kua toitoi haere. {hōkai, toi2}

2. ‑a ‑tia ‑nga ‑tanga [Tūmatauenga] mahw, ing, āhua. Ka whakaohooho i te ngākau o tētahi atu me te whakahau i a ia kia mahi i tētahi mahi taikaha, tētahi mahi rānei e takahi ana i te ture. He mea toitoi te whakaminenga kia ātete i ngā kātipa a te Karauna.  whakakā (1)

3. ‑a ‑tia ‑nga ‑tanga [Tūmatauenga] Ka whakatō i te wairua kaha ki tētahi atu e whāia ai tētahi mahi, e kaha tonu ai rānei ki te mahi. Ka toitoia ngā tāngata e nohopuku ana kia tū ki te kōrero, kia kaua e whakamā.  akiaki1

toitoi waka [Tūmatauenga] ing. He waiata whakatītina i ngā kaihoe kia kotahi ai te hoe. Ka rongo ngā kaihoe i te toitoi waka, ka kaha kē atu te hoe, ahakoa kua pau noa atu te hau.  tuki (7)