This countdown requires you to have the latest Flash player - you can download it here.

He aha te kupu e kimi ana koe i te ī-papakupu?

 
Te āhua o ngā kōrero ka takoto: poto    roa



tau1

1. [Ranginui] ing. Te wā ka taka e oti ai te huringa kotahi a Papatūānuku i a Tamanuiterā, ko tōna 365 rangi te roa; tētahi 365 rangi (366 rānei i te tau roa) ka tīmata i te 1 o Kohitātea. (i) E hia ngā tau o tō tamāhine? (ii) Nō te tau 1967 ia i whānau mai ai.

tērā tau [Ranginui] Te tau ka pahure ake. (i) Nō tērā tau ka kōrero tahi rātou ko Te Mākarini, ka whakaotia hoki i reira te nuinga o ngā raruraru (WM 8, 7). (ii) Otirā, kīhai au i whakapono ki āna kupu katoa i tuhi mai ai i tērā tau (H 51). {tauhouanga, tauhounga}

tērā tau [Ranginui] Te tau e tū mai nei. (i) E hoki mai ana anō au ā tērā tau (Wh 18, 1). (ii) Kāore ahau e mātau ana tērā pea ahau e haere mai ā tērā tau, kāore ranei (HTK 1, 14).

2. [Ranginui] Te roa o te wā e mahia ana tētahi mahi, e pā ana rānei tētahi āhuatanga. He roa te tau i te tohenga, ka horo te pā (W 395).  1 (3)

tau2

1. [Tāne] ing. He aho e herea ai, e mau pai ai te kākahu ki te tinana, e iri mai ai rānei te patu ki te kawititanga o te ringa. (i) Ka wetea te tau o tana kahu. (ii) Kātahi te tama ka whakatika, whakawiria iho te tau o te patu ki te ringa (W 395).

2. [Tāne] Ngā puritanga ringa o te kete. Ko te wāhi o te kete i ruha, ko runga, i te wāhi i honoa atu ai ngā tau.  kīwai (1)

3. [Rongo] Ētahi mea kua herea tahitia, kua pōkai tahitia, kua takaia tahitia rānei. Me takai te tau harakeke kia kore ai e maroke.  paihere (2)

tau3

1. [Ranginui & Papatūānuku] ing, āhua. Tētahi o te tokorua e moe puku ana, arā, kāore e mana ana te moe tahi. Ki konā hoki koe, e te tau, ki konei au whakamau ai ki te auahi (NM4 357, 3).  whaiāipo (1)

2. [Ranginui & Papatūānuku] ing. Tētahi o te tokorua kua mana tā rāua noho tahi. Me mihi kau atu i te nuku o te whenua. Hei konei rā ē, e te tau pūmau (TT 22, wh9).  hoa1 (hoa rangatira)

3. [Ranginui & Papatūānuku] He kupu e tohu ana i te tangata e aroha nuitia ana. (i) He putiputi koe, i katohia, hei piri ki te uma, e te tau! He tau aroha koe, koronga roa (HM 4, 3). (ii) Manako mai, e te tau, ki tō hoa moenga (NM1 68, 7). {kahurangi, kairangi1 (4), kōmata, kura1 (13), makau1, manawa, māpihi, paruhi2, pāruhiruhi, piki2 (piki kōtuku), tahu3 (4), takawairore, taupuhi, tōrere, whakaeanga}

tau4

[Papatūānuku] ing, āhua. Te pae (o ētahi puke, o ētahi maunga rānei), he roa, he whāiti. Ka tae ki runga ki te maunga, na ka haere i runga i te tau (W 396).  kahiwi (2)

tau5

[Tāne] ing. He tohu (pērā i te 1, i te 2), he kupu rānei (pērā i te 'tahi', i te 'rua') ka whakamahia hei tatau i ētahi mea. Ko ngā tau kei runga ake i te 0, ka kīia he tau tōrunga, ko ngā tau kei raro iho i te 0, ka kīia he tau tōraro. {nama}

tau6

1. ‑nga [Tāne] mahp, ing, āhua. Ka tae ki tētahi wāhi me te noho tonu i reira, ka ū ki tētahi pae, ki tētahi nohoanga, ki tētahi takotoranga. (i) Tau noa atu ia i te matapihi o te whare o Tinirau (N 26). (ii) Ka pā te karanga, 'Tau kau ki raro' (W 396). (iii) E tau mai ana tana titiro ki a au (W 396). (iv) Kua tau kē mai tana waka rererangi. Taihoa ia ka puta mai.

2. ‑nga ‑ranga [Tangaroa] Ka noho, ka rere rānei i te mata o te wai, kāore e totohu. Ka whiua atu (te tahā) ki te wai, e tau kau ana ki roto i te wai (W 396).  mānu (1)

3. ‑nga [Rongo] Ka oti (tētahi take, tētahi āhuatanga rānei) te whiriwhiri, ka kitea he huarahi ahu whakamua. (i) Ā kāti kua tau tēnā. Ko tāua tahi e haere. (ii) I pakanga te whānau i waenganui i a rātou anō mō ō rātou whenua, ā, tino kaha te wehewehe o ō rātou whakaaro. Heoi anō, mā te aha kua tau (KK 42). {tatū}

4. ‑nga [Rongo] Ka mauru, ka hoki anō ki tōna āhua ora o mua (o te ngākau, te wairua, ngā whakaaro, te noho rānei kua hē, kua raru). (i) Kua tau anō te wairua, kua kore i māharahara. (ii) Nāwai ā, ka tau anō te ngākau kōnatunatu. (iii) Ka reka te moe, ka tau ngā whakaaro, ka kite te roro i ngā mea kei mua i te aroaro (PH 4, 11). (iv) Ko tana mahi hoki he kōhuru tonu, he kino noa iho. E kore e tau te noho o ngā iwi noho pai i a ia e haere noa ana (WMA 6, 12). {tatū}

tau7

1. [Tūmatauenga] ing. He kupu whai rangi ka titoa hei whakaputa whakaaro mō tētahi kaupapa, mō tētahi tangata rānei. Nā wai i tito ngā kupu o te tau i waiatatia e koutou?  waiata (2)

2. [Rūaumoko] He oro hoihoi.  2 (7)

3. [Rūaumoko] He oro ka pakō ake, ka tino rangona. Ka rongo ia i tētahi tau, me te mea nei i pahū tētahi mea.  rengapapā

4. ‑a ‑nga [Tūmatauenga] mahw, ing, āhua. Ka whakaputa kupu me te whai o te oro o te kupu i tētahi rangi. Ka tau te tini o te Hakuturi i tana tau.  waiata (1)

5. ‑nga [Tāne] mahp, ing, āhua. Ka whakaputa (te kurī) i tētahi oro kaha, āhua rite ki te pakō, ki te pakē rānei. Nō te pō o te wiki, ka hui mātou ki te whare, ka moe mātou, ka tītaha te marama, ka tau te kurī (KNT 1, 8).  auau3

tau8

‑a ‑nga [Tūmatauenga] mahw, ing, āhua. Ka rere whakamua ki te patu (i te hoariri). Ka haere te taua a Ngāti Awa . . . ki te tau i te pā o taua tangata (W 396).  huaki (1)

tau-1

[Tāne] pīa. E tohu ana i te rerekē, i te tauhou (o te tangata, o te whenua). (i) He tautangata tēnā korokē ki ahau, inā, kāore anō ahau kia kite, kia tūtaki rānei ki a ia. (ii) Ko Pōwhero i whakaaro tonu ia he rangatira a Kāpene Kuki nō tētahi hoariri tauwhenua, ka mea me patu, kāore ngā hoa i whakaae (PH 7, 17). (iii) Tētahi mahi a ngā tāngata o Ingarangi i taua wā, he kawe i te Rongo Pai ki ngā tauiwi o te tuawhenua (PH 3, 16).

tau-2

[Tāne] pīa. E tohu ana i te ahunga rua, i te ahunga tauaro (o te mahi kei te wāhanga tuarua o te kupu): rere atu, rere mai, mahi atu, mahi mai, whiu atu, whiu mai. (i) Kei te tautohetohe tonu ngā hapū e rua - e kore e kotahi ngā whakaaro. (ii) E taututetute ana ngā manu i te pae. (iii) Kua taupiripiri ngā kuia, ko tētahi e whakawhirinaki ana ki tētahi.

tau-

tau whakautuutu [Ranginui & Papatūānuku] ing. He kawa whaikōrero e hohoko ai ngā kaikōrero o ngā taha e rua, arā o te tangata whenua me te manuhiri. Ko te kawa o Tainui he tau whakautuutu, tū atu tū mai (Wh 46, 2).  tauutuutu

tāu

[Tāne] pmu. E tohu ana nā te kaiwhakarongo, te kaipānui rānei te mea ka whakaingoatia i muri tonu mai, i mua tonu atu rānei, ā, nō te rōpū-'a' taua mea. (i) Ko tāu nā mahi, he tuhi noa i ngā kōrero ka puta ake. (ii) He rata ake tāu ngeru i tāku. (iii) He waea pūkoro anō tāu? {tāhau2} tōu