This countdown requires you to have the latest Flash player - you can download it here.

He aha te kupu e kimi ana koe i te ī-papakupu?

 
Te āhua o ngā kōrero ka takoto: poto    roa



take

1. [Tāne] ing, āhua. Te wāhanga o te tipu kei roto i te whenua e tupu ana (i te nuinga o te wā), e tautoko ana i te tipu, e tango wai ana, e tango kai ana mai i te oneone. Ka tūtuki tana waewae ki te take o te rākau, ka hinga ki raro.  3 (3)

2. [Papatūānuku] ing. Te wāhanga whakararo rawa (o tētahi mea). (i) Rokohina atu e noho ana te ruahine matakerepō i reira, i te take o te pikitanga (W 370). (ii) Kua pirau te take o te pou i te mākū o te whenua.  pūtake (1)

3. [Tūmatauenga] Te hanga tonu nāna i pā ai tētahi āhuatanga, te hanga rānei e whakamārama ana he aha i pā ai tētahi āhuatanga. (i) A: He aha te take i turakina ai taua whare? K: He pirau katoa nō ngā papa. (ii) Kei te tino mokemoke māua ki te hau kāinga - koinā te take e hoki ana māua ki reira, noho ai. {mea1 (2), pata1 (3), pūnga, pūtake, rawa1 (4), takunetanga, tikanga}

4. [Ranginui & Papatūānuku] Te wāhi, te tangata, te hanga rānei i tīmata mai ai, i ara ake ai tētahi mea. Ko Mahuika te take o te ahi.  pūtake (3)

takea [Ranginui & Papatūānuku] mahh. Ka tīmataria mai, ka ara tuatahi mai. (i) Kitea rawatia ake, kua muia e te iro. Nō reira i takea ai te ingoa o Hikairo (IwiT 38:3). (ii) He ōhākī i takea mai i te Tiriti o Waitangi, he kupu tapu nō ngā whakatupuranga (KRK 117). (iii) Koia te tangata i takea ai te whawhai ki ngā motu nei (Wa 3, 47). {pūtake (pūtakea)}

5. [Tūmatauenga] ing. He karakia. Ruhi noa, ngenge noa, i ō pū, i ō take (W 370).

6. [Tūmatauenga] He kaupapa whai kiko hei whiriwhiri, hei kōrerorero, hei whakatau. (i) Ka kōrerotia te take nei e ngā kaumātua, e ngā rangatahi, ā, tau noa te puehu. (ii) Ka noho ia i te taha o te takuahi ka tangi te mapu. He tikanga tērā nāna kia mōhio mai ai tana koroua he take nui kei a ia i tae atu rā (IwiT 46:11). (iii) Kua hokona katoatia e koutou te nuinga o ngā whenua, a ka pēwhea ā koutou tamariki āpōpō? He take tino nui tēnei hei whiriwhiri mā koutou (TT 21, wh6).

7. [Tūmatauenga] Te upoko, te kaiārahi o tētahi iwi, he tangata whai mana i roto i te iwi. He kawenga kei runga i te take ki te ārahi tika i tōna iwi.  rangatira (1)

takē

1. ‑tanga [Tūmatauenga] mahp, ing, āhua. Kāore e puta ake, e tae ake, ka wehe atu, ka ngaro atu rānei. (i) Takē kōanga; whakapiri ngahuru (W 370). (ii) Takē ana a Rangi i te wā mahi, he māngere hoki.

2. ‑tanga [Tāne] Ka kotiti, ka hē noa iho te haere, te takoto rānei. Kua takē te noho o tana neketai, he hohoro nōna i te ata nei.  parori (1)

tāke

[Tūmatauenga] ing. reo kē. He moni kia mātua utua e te tangata ki te kāwanatanga, ka whakamahia hei kawe i ngā ratonga tūmatanui. E herea ana te rahi ki te rahi o ō whiwhinga moni, ō rawa, ngā taonga ka hokona e koe, me ērā atu tūmomo mea. Ka mahi ana te tangata, ko tētahi wāhanga o tana utu, he tāke ka riro i te kāwanatanga.