This countdown requires you to have the latest Flash player - you can download it here.

He aha te kupu e kimi ana koe i te ī-papakupu?

 
Te āhua o ngā kōrero ka takoto: poto    roa



reti1

1. [Tūmatauenga] ing. He taputapu whai koromāhanga hei hopu manu. He manu rata, ka mau noa ki tō ringa tonu, hei aha te reti.  māhanga2 (1)

2. ‑a ‑nga [Tūmatauenga] mahw, ing, āhua. Ka hopu (i te manu, i te kiore, i te aha atu) ki tētahi taputapu. E reti manu ana a Tomo i te ngahere.  māhanga2 (2)

reti2

1. [Tāne] ing. He papa māmā ka whakamahia hei tipi i te papa mania, i te mata rōnaki rānei. Haria mai tō reti, kia pai ai tā tāua haere ki te panunu i te puke rā. {pānukunuku, panunu, papareti, tōreherehe}

2. [Tāne] He waka iti, kāore ōna rauawa, kāore ōna whakairo. (i) Tē ai he reti ake hei whiu i a au kia kite hoki au (W 338). (ii) Ka utaina ahau ki te reti (W 338).  kōpapa (1)

3. [Tūmatauenga] He taonga matakite i mahia ki te tā toetoe, ki tētahi tipu pērā rānei, ka rākaitia ki te rau rangiora, kātahi ka whiua mai i tētahi wāhi teitei ki te whakaatu mai i ōna tohu. Karakia ana, ka mutu, kātahi ka tukuna tana reti . . . kīhai i roa ka tahuri tana reti; ka whakaaro e kore e tika he ara mōna (Pi 135, wh3).

4. [Tūmatauenga] He tao poto, he koi ngā pito e rua.

5. [Tāne] He taputapu tākaro, he teitei tētahi pito, he māeneene, he rōnaki te mata hei rerenga iho mā te tamariki. Ka tae mātou ki te papa tākaro, ka kotahi atu ngā tamariki ki te reti.

6. ‑nga [Tāwhirimātea] mahp, ing, āhua. Ka eke i tētahi momo papa, ka whakamau rānei i tētahi momo hū, ka tipi haere, ka kaunuku haere i tētahi mata. (i) Kua haere rāua ki Tūroa ki te reti hukapapa. (ii) Ahakoa haere ia ki hea, kei konā anō tana papa wīra, e pai ai tana reti haere. (iii) Kua rārangi kē mai ngā wīra o ngā hū reti o ēnei rā, ko tētahi i muri i tētahi. {panunu}

reti3

‑hia ‑tia ‑tanga [Tūmatauenga] mahw, ing, mahp, āhua. reo kē. Ka utu i tētahi utu e āhei ai koe ki te whakamahi i te rawa, i te taonga rānei a tētahi atu mō tētahi wā kua whakaritea. (i) Mehemea kāore ōna utu reti whare ka tino ngāwari rawa atu (TT 51, wh316). (ii) Ko te reti e mana ai tēnei whakaritenga, ko te reti i te whenua hei nohoanga hipi, kau, hōiho, me era atu kararehe (Wa 5, 18).  rīhi1