This countdown requires you to have the latest Flash player - you can download it here.

He aha te kupu e kimi ana koe i te ī-papakupu?

 
Te āhua o ngā kōrero ka takoto: poto    roa



pupuhi

1. ‑tanga [Tāwhirimātea] mahp, ing, āhua. Ka korikori (te hau), ka rere ki tētahi wāhi. (i) E moe ana ia, ka pupuhi te hau, ka tīmata ngā rākau ki te rūrū, me te takataka iho o te huarākau (Wh 6, 10). (ii) He onepū katoa te whenua, ka pupuhi te hau ka rere te puehu, ka kī ngā mea katoa (PH 2, 22). {ihi5, 3}

2. ‑tanga [Tāne] Ka rahi ake, ka porotaka ake tētahi mea, i te mea e kaha ana pea te pupuri wai, te pupuri hau, e tipu ana rānei. (i) Tino marū tana tinana i te mamae . . . oho rawa ake i te ata, kua pupuhi katoa tētahi o ana waewae (Wh 6, 7). (ii) Otirā ko tēnei taonga nui ko te kata he ngāwari noa, kāore he utu, heoi anō ko te pupuhi ake o ngā pāpāringa, ko te pupuri hoki i ngā kaokao (KRK 153). {konaki1, kōnakinaki, kōpuku, koropuku, matakoma, puku1 (7), tetere, toko2 (1), totoko, tōuwha, uruumu, whāngai}

3. pūhia ‑nga ‑tanga [Tāwhirimātea] mahw, ing, āhua. Ka mahi kia pā te hau ki tētahi mea, ki tētahi wāhi rānei. (i) Pūhia te kānara kia weto. (ii) Kāore i te pai te tupu o ngā tōmato, he mea pupuhi e te hau. (iii) Me pupuhi tō hupa kia tere mātao ai.

4. pūhia ‑nga ‑tanga puhanga [Tūmatauenga] Ka mahi kia mate, kia taotū rānei tētahi hanga i te rere a te matā i te pū. (i) Ki te moe tētahi hēteri i te wāhi i whakaritea ko ia hai tiaki, tērā tonu ia e pūhia (HP 179). (ii) Ka kī atu a Tāwhaki, 'Anā e hoa. Pūhia.' I te pakūtanga o te pū, kāore kē i tū. Oma atu ana te tia (Wh 1, 3). (iii) Kua haere ki te pupuhi manu māna i te ngahere.