This countdown requires you to have the latest Flash player - you can download it here.

He aha te kupu e kimi ana koe i te ī-papakupu?

 
Te āhua o ngā kōrero ka takoto: poto    roa



ngutu

1. [Tāne] ing. Tētahi o ngā wāhi kikokiko e rua i ngā tapa o te waha. Kaua e hongi, kaua e kihi i ngā ngutu o te tangata ahakoa whanaunga tata, ā, kaua rawa i ngā tamariki (KRK 218).

ngutu kau [Tāne] ing, āhua. He kōrero, he kī taurangi rānei kāore i whakatinanatia, kāore i whakatutukihia. (i) Kua mōhio ināianei he ngutu kau ana kōrero, kāore he tinanatanga, he wairua kau (WM 18, 1). (ii) Aua rā e turi ki tēnei kupu. Aua e whakaae ngutu kau. Engari, me mahi (Ha 1, 3). (iii) Ehara i te kōrero ngutu kau ēnei e kōrerotia nei, engari nō roto nō te ngākau (KtKM 7, 17).

ngutu momoho [Tūmatauenga] ing. He tangata kawe i te kōrero kino kia heke ai te mana o te tangata, o te kaupapa, he kaha ki te whakahāwea i tētahi atu. Kia tūpato ki te ngutu momoho e whakaiti ana i te kaupapa me te hunga nāna i whakahaere.

ngutu tere [Tūmatauenga] ing, āhua. He tangata patipati, he tangata nukarau, kāore i pono. Ko ngā tāngata e whai moni ana hei utu mo te ruritanga, e kaha ana, e ngutu tere ana hoki ki te kōrero i roto i te Kōti . . . ā mate ana te tangata kūare, te tangata tika (WM 9, 16).

2. [Tāne] ing. Ngā hanga mārō e kounu mai ana i te waha o te manu, he koi ō te nuinga. (i) He tino roa ngā ngutu o te kiwi. (ii) E papaki ana ngā ngutu o ngā toroa ki te mihi tētahi i tētahi.

ngutu huia [Tūmatauenga] He tangata tino kaha ki te kōrero me te whakaputa mōhio hoki. He mōhio ake te ngutu huia rā i taku rōia. {(ngutu pī)}

ngutu kākā [Tāne] He rākau e 2 mita te tupu, he pinerua te tupu o ngā tawheraiti i ngā rau roroa, he pōī tautau te tupu o ngā pua whero, he pango te pākākano ina pakari. Clianthus puniceus. {kōwhai (kōwhai ngutu kākā)}

ngutu kākā [Tāne] He tauira kōwhaiwhai. Te pai o te piko, o te rere, o te wehi hoki o te ngutu kākā i tāia e Rangi ki ngā heke o te whare.

ngutu kākā [Tāne] He harakeke roa, he pounamu ngā whā. Phormium tenax.

ngutu kākāriki [Tāne] He huruwhenua whai kahiwi poto 1 mita te tupu. Leptopteris superba.  tētēkura (1)

ngutu parore [Tāne] He manu noho tahatika, he kiwikiwi a runga, he mā te rae me te korokoro, he tāhei pango kei te kakī, he mā a raro, he ngutu parori, he kiwikiwi ngā waewae. Anarhynchus frontalis. {(ngutu pare)}

ngutu pare [Tāne] He manu noho tahatika. Anarhynchus frontalis.  (ngutu parore)

ngutu pārera [Tāne] He harakeke āhua roa tonu, he karera, he pūhuki, he piko whakawaho ngā whā, he harakeke tino pai mō te mahi muka. Phormium tenax.

ngutu pī [Tūmatauenga] He tangata tino kaha ki te kōrero me te whakaputa mōhio hoki. Pātaihia te ngutu pī rā, māna koe e whakamōhio ki ngā mea katoa!  (ngutu huia)

ngutu roa [Tāne] He ingoa whānui mō te manu māori rongonui o te ao, he roa ngā ngutu. Ka aroha anō te ngutu roa e mate nei i ngā kararehe tawhiti. Apteryx spp.  kiwi (1)

3. [Tāne] Te tapa e huri ana i te waha o tētahi ipu. (i) Kātahi ka pēhi iho te puru o te pātara, ka tuhera te ngutu o te pātara (PH 5, 3). (ii) Kātahi ka tangohia ake ka tuia te ngutu o te pēke (WM 1, 17). (iii) E whakahāngai mai ana tētahi o te hoariri i tana pū, ka hopukia atu e ia te ngutu o te pū, ka whakaarahia ki runga (T 3, 73).

4. [Tāne] He hanga rite ki te kakī mō runga i te tahā, i hangaia ki te rākau, i āta whakairohia a waho, he moani a roto, i waruwaruhia kia noho pai mai ai ki te waha o te tahā. I mahia he kōhao i te tapa whakararo o ētahi kia pai ai te tui atu ki ngā kōhao kua mahia mai ki te tapa whakarunga o te tahā. Ehara, ka taha te patu i tōna angaanga, ka pakaru ko te tahā, mau mai i a ia ko te ngutu anake o te tahā rā (N 78). {hōrere, paewai, titi2, tokai, tōkari, tuki}

5. [Papatūānuku] Te wāhi o te awa e puta atu ai ōna wai ki tētahi atu awa, ki tētahi roto, ki te moana rānei. I te ngutu o te awa o Hamurana ka tau tō mātou tima, ka haere mā uta, ka mātakitaki ki te āhua o tēnā awa, purata tonu, kākāriki ana (Pi 46, wh10).  ngutuawa

6. [Papatūānuku] Te wāhi whāiti e pari mai ai te tai ki tētahi whanga, e hoki anō ai ki te au moana. Kia tata atu ki te ngutu o te whanga, ka kaha kē atu te ia o te wai.  pūaha (2)

7. [Tūmatauenga] Ngā ara e rua kei ngā taha o te tomokanga o te pā e uru atu ai te tangata ki te pā.

8. [Papatūānuku] Te tomokanga (ki te ana). Ka whakaritea ngā tāngata hei pātaritari atu i te ngutu o te ana (W 236).  ihi4 (2)

9. [Tūmatauenga] He kōrero ka hariharia e te tangata, ehara pea i te kōrero pai, i te kōrero pono rānei. Kua rongo koe i te ngutu kino e rere nei mōna? E ai ki te kōrero, nāna tonu pea i āta tahu tō rātou whare kia pau ai i te ahi.  kohimu (5)