This countdown requires you to have the latest Flash player - you can download it here.

He aha te kupu e kimi ana koe i te ī-papakupu?

 
Te āhua o ngā kōrero ka takoto: poto    roa



matu

1. ‑a ‑nga [Tūmatauenga] mahw, ing, āhua. Ka wehe i tētahi mea ki te taputapu koi, pēnei i te māripi, i te aha atu. Me matu te ika, ka mirimiri atu i te tote ki te kiko.  tapahi

2. ‑a ‑hia ‑nga [Tūmatauenga] Ka wehewehe i tētahi mea ki te taputapu koi, pērā i te māripi, i te aha atu, e oti mai ai he wehenga maha. Ka matuhia ngā kamokamo ka utaina ngā wāhanga ki runga i ngā mīti, i ngā wātakirihi, kōhua mai ai.  tapatapahi

matū

1. [Papatūānuku] ing. Te hanga hinuhinu kei te tinana tangata, tinana kararehe, he mā, he kahotea rānei te tae, kitea nuitia ai i raro tonu i te kiri, e kōpaki ana rānei i ngā whēkau. Ka mate, ka tuakina ngā puku ka taona ki te hāngi ka kainga — ko te matū, i waiho ki rō tahā hei kīnaki taro mā rātou (WMA 3, 70).  mōmona (4)

2. [Tūmatauenga] He mōmona, he hanga rānei e rite ana ki te mōmona e tino reka ai te kai, te kōrero rānei. (i) Pākorakora ana ngā ngutu i te matū o te tītī. (ii) He maroke ana kōrero, kāore he matū. (iii) Ka whakairohia ki te ngako whakataukī a te Māori, ka rōreka te matū o ana waiata ki te ngao o te hinengaro (TTR 1, 55).

3. [Tāne] Te wāhi tino whai tikanga, tino whai kiko (o te kōrero, o te whakaaro). (i) Ka whakatakotoria e Kepa te matū o ngā kōrero tuku iho me ngā whakapapa o Te Arawa (TTR 4, 35). (ii) Ko te matū o tana kōrero, kaua e waiho mā ngā kura anake hei whakaora mai i tō tātou reo.

4. [Tāne] ing, āhua. hou. He huinga korakora motuhake i pūtakea mai i te whenua, ko te maha atu i raweketia anō hoki e te ringa tangata. He pai noa atu te huawhenua kua whakatupuria ki te wairākau māori, tēnā i te kai kua whāngaihia ki te tini matū i mahia ki te wheketere.

5. [Ranginui & Papatūānuku] ing. hou. He kupu pūtaiao mō te hanga nāna i whai kiko ai, i whai tinana ai, i whai taumahatanga ai ngā mea katoa o te ao. (i) E toru ngā āhua o te matū - ko te totoka, ko te wē, me te haurehu. (ii) He matū taumaha tonu te nuinga o ngā toka.