This countdown requires you to have the latest Flash player - you can download it here.

He aha te kupu e kimi ana koe i te ī-papakupu?

 
Te āhua o ngā kōrero ka takoto: poto    roa



manu

1. [Tāne] ing. He hanga ora whai parirau, whai huruhuru, he whai tuaiwi, ka whakaputa hua e puta ai he uri; ētahi atu hanga ora whai parirau nui, pērā i te pekapeka, te kīkītara, te rangataua, te pūrerehua. He manu māori te kōkako, te tīrairaka me te huia.

manu kahaki [Tāne] He manu iti noho ururua. Anthus novaeseelandiae.  pīhoihoi

manu tāhae [Tāne] He manu nui tonu noho mānia. Circus approximans.  kāhu1 (1)

manu tāiko [Tāne] Te manu noho mataara i te wā e kai ana te kāhui. {(manu tākaha), (manu taki), (manu tūtei), (manu teka)}

manu tākaha [Tāne] Te manu noho mataara i te wā e kai ana te kāhui. Kia kite kōrua i ngā manu whakaatu tau i mahue i te pae o te kōhanga, haere ana ngā manu tākaha o te pae, mahue ana ngā whakaatu tau (Wa 4, 44).  (manu tāiko)

manu taki [Tāne] Te manu noho mataara i te wā e kai ana te kāhui.  (manu tāiko)

manu taupunga [Tāne] He manu ka ākona ki te ngē kia pai ai te onga i ētahi atu manu. Kua rere mai te pōkai manu i te rongotanga i te manu taupunga e ngē ana. {(manu tīoriori), puarere1} mōkai (4)

manu teka [Tāne] Te manu noho mataara i te wā e kai ana te kāhui.  (manu tāiko)

manu tīoriori [Tāne] He manu ka ākona ki te ngē kia pai ai te onga i ētahi atu manu.  (manu taupunga)

manu tuatea [Tāne] He manu mōmona, he manu e kitea ai te mā o te kiri i raro i ngā huruhuru.

manu tūtei [Tāne] Te manu noho mataara i te wā e kai ana te kāhui.  (manu tāiko)

manu a Rehua [Tāne] He pepeke kai rau mānuka. Pyronota festiva.  kēkerewai (1)

2. [Tāne] He taonga tākaro rite ki te manu te hanga, he whai anga māmā ka uhia ki te raupō, ki te pepa, ki te aha atu, he aho roa tōna ka mau tētahi pito ki te ringa, ka tukua kia rere rā runga hau. Ka rere taku manu, ka hoka taku manu ki runga, ko tōna aho ki taku ringa.  (manu tukutuku)

manu aute [Tāne] He taonga tākaro rite ki te manu te hanga, he whai anga māmā ka uhia ki te raupō, ki te pepa, ki te aha atu, he aho roa tōna ka mau tētahi pito ki te ringa, ka tukua kia rere rā runga hau.  I uhia te anga o tēnei o ngā manu ki te hiako mā o te aute. (i) He manu aute au e taea te whakahoro ki te aho tāmiro? (W 176) (ii) He manu tohu aituā te manu aute; mehemea ka kō, he aituā; mehemea ka āta tū, ā whiti ana te rā ki tua (GP 132).  (manu tukutuku)

manu pākaukau [Tāne] He taonga tākaro rite ki te manu te hanga, he whai anga māmā ka uhia ki te raupō, ki te pepa, ki te aha atu, he aho roa tōna ka mau tētahi pito ki te ringa, ka tukua kia rere rā runga hau. E oma ana i te onepū me te pupuri anō i tana manu pākaukau, nā wai ā, ka rewa tana manu ki te rangi.  (manu tukutuku)

manu puai [Tāne] He anga māmā nei te hanga kua uhia ki te raupō, te pepa, te aha atu rānei, he tapatoru te āhua, ka tukua kia rere i te hau ki tētahi aho roa.

manu tara [Tāne] He manu tukutuku tapatoru te hanga, kia turua ki te rangi ko te tara kei runga, i mahia te anga ki te kākaho, ka uhia ki te raupō, he pua toetoe kotahi kei te tara, e toru ka tautau iho i te tapa whakararo, ko te aho ka herea ki te tohe kei waenganui o te anga. Kia paku kaha ake te hau ka haere ai tāua ki te turu i te manu tara nei.  (manu taratahi)

manu taratahi [Tāne] He manu tukutuku tapatoru te hanga, kia turua ki te rangi ko te tara kei runga, i mahia te anga ki te kākaho, ka uhia ki te raupō, he pua toetoe kotahi kei te tara, e toru ka tautau iho i te tapa whakararo, ko te aho ka herea ki te tohe kei waenganui o te anga. Ka whakahorohoro a Ruatapu i tana manu taratahi, te tapakōtanga tau ana ki runga ki te whare o tōna matua o Uenuku (W 382). {(manu tara), taratahi}

manu tū [Tāne] He momo manu tukutuku. Tukua atu au kia rere ā-manu tū (W 176).

manu tukutuku [Tāne] He taonga tākaro rite ki te manu te hanga, he whai anga māmā ka uhia ki te raupō, ki te pepa, ki te aha atu, he aho roa tōna ka mau tētahi pito ki te ringa, ka tukua kia rere rā runga hau. E Rua, titiro ki te tītaritari, ki te porotēteke o taku manu tukutuku. Titiro, kei te rere rā runga. Kei te totohu (Wh 34, 4). {kāhu1 (3), (manu aute), (manu pākaukau), (manu whakatukutuku), manu, pākau, pākaukau, tārehurehu, tīoriori (manu tīoriori), tīoriori}

manu whakatukutuku [Tāne] He taonga tākaro rite ki te manu te hanga, he whai anga māmā ka uhia ki te raupō, ki te pepa, ki te aha atu, he aho roa tōna ka mau tētahi pito ki te ringa, ka tukua kia rere rā runga hau. I mahia mai ngā manu whakatukutuku nei ki te raupō me te toetoe.  (manu tukutuku)

3. [Tūmatauenga] He kupu whakarite mō te rangatira. Kei te mihi ki a koutou kei ngā pāhake, ngā manu mōhio o te pae tapu.  tētēkura (2)

manu pirau a Tiki [Tūmatauenga] ing, āhua. Te tinana o te tangata kua mate.  Kupu whakarite. Tukua te manu pirau a Tiki ki te kōpū o te whenua, hei kai mā popo, mā hanehane.  tūpāpaku (1)

manu taupua [Tūmatauenga] ing. He kupu whakarite mō te rangatira. He tino tangata tērā, he manu taupua, he rangatira nui nō konei.  tētēkura (2)

manu taupunga [Tūmatauenga] He kupu whakarite mō te rangatira. Kei aku manu taupunga, kei aku ariki e tau nei, tēnā koutou.  tētēkura (2)

manu tūtei [Tūmatauenga] He kupu whakarite mō te rangatira. I kīia tērā momo rangatira he manu tūtei, i te mea he āta mātakitaki, he āta tiaki i tōna iwi.  tētēkura (2)

mānu

1. ‑tanga [Tangaroa] mahp, ing, āhua. Ka noho, ka rere rānei i te mata o te wai, kāore e totohu. Ka kitea tētahi mea i tawhiti e mānu ana i runga i te wai, me te mea he poti te āhua (WMA 2, 30). {kere, tau6 (2), taupua, tere, whakamāpuna} rewa (2)

2. ‑tanga [Tangaroa] Ka rere iho (te wai, te aha atu) i te niao o tētahi mea, i ngā paretai o tētahi rerenga wai, i te mea kua kī rawa. Kīhai koe i whakaaro kia mānu te wai i runga o Ngāmotu (W 176).  puhake (3)