This countdown requires you to have the latest Flash player - you can download it here.

He aha te kupu e kimi ana koe i te ī-papakupu?

 
Te āhua o ngā kōrero ka takoto: poto    roa



manawa

1. [Tāne] ing. Te wāhanga o te tinana kei raro atu i ngā rara, kei reira e noho mai ana te puku me ngā kōpiro. Ka ruakina mai anō a Hona i te manawa o te ika.  kōpū (2)

2. ‑tanga [Papatūānuku] ing, mahp, āhua, tūkē. A roto rawa o Papatūānuku, te wāhi o te whenua e tawhiti tonu ana i te mata. (i) Ka wāhia te whenua e te kupu karakia a Hatupatu, kia toro manawa ia mā raro i te whenua (W 174). (ii) Nō te manawa kē tēnei toka, engari i roto i ngā tau tini whāioio kua panaia ki runga, e taea atu ai e te tangata.

puna manawa [Tangaroa] ing, āhua. He puna wai ka pupū ake i te manawa o te whenua, e kore e mimiti. (i) Ka keri ngā hōia i roto i te awaawa, ā, ka kitea e rātou i reira he puna manawa. (ii) Me kore ake te puna manawa i te tauraki.  (manawa whenua)

manawa whenua [Papatūānuku] āhua, ing. I takea mai i roto rawa i a Papatūānuku, e kore rawa e mimiti (o te puna wai). (i) Na ko te puna wai i Motumako he wai manawa whenua tērā (W 174). (ii) Inā kē te nui o te mātauranga kei tēnā tangata - he puna manawa whenua tonu.

manawa whenua [Tangaroa] ing, āhua. He puna wai ka pupū ake i te manawa o te whenua, e kore e mimiti. Na ka keri ngā pononga a Īhaka ki te awaawa, ā ka kitea e rātou i reira he puna manawa whenua (PT Ken 26.18). {(puna manawa), mano2 (wai mano whenua)}

3. [Tāne] ing. Te whēkau o te tinana e tuku ana i ngā toto huri noa i te tinana. (i) Ka inu waipiro te tangata ka tere te panapana o te manawa, ka tere hoki te rere o ngā toto ki ngā wāhi katoa o te tinana. Ka mumura te kiri ka wera (KRK 104). (ii) Ka pai te ngāwari me te maene mai o te kiri o te papa o te wahine rā ki te titiro atu, ka hiki te manawa, ā kaha atu te hiahia i a Wheto ki te wahine nei (IwiT 50:27).

manawa hē [Ranginui & Papatūānuku] He mate ohorere e hē ai te mahi a te manawa i te mea kua puru tētahi o ngā iaia kawe toto ki a ia. (i) E rārangi mai ana ngā whakatūpato kia kore ai te tangata e pāngia e te manawa hē. (ii) Ko te mate i tipu mai i te manawa hē ohorere (T 1, 1).

4. [Tāwhirimātea] Te hau ka tukua e ngā pūkahukahu ki waho, e taea ana te rongo atu. Kua rere ake te manawa nei ki runga ki te ihu (W 174).   (1)

hē te manawa [Tāne] kīa. Ka ngāngā i te pau o te hau. E piki ana anō i tana pikitanga ki Māheahea, ka hē te manawa (W 174). {hēmanawa, naenae1 (naenae te manawa), pukā}

manawa ahi [Ranginui] ing. Te auahi, te mamaoa rānei ka puta ake i te rākau haukū i te ahi. Kia maroke ngā wahia, kei mate noa iho ō tātou karu i te manawa ahi.

manawa kiore [Tūmatauenga] Te ngā whakamutunga i mua o te matenga. Kua kore e kaha ki te kōrero; ka oho te manawa anake, manawa paku; ka kīia tēnā he manawa kiore (W 174).  tuamatangi

5. [Ranginui & Papatūānuku] Te noho mauri tau tonu, te kore e riri, te kore e amuamu, ahakoa te pā mai o tētahi āhuatanga whakapōrearea, ahakoa rānei te roa e tāria ana tētahi mea. (i) Kei te whakaporo koe i te manawa o Matuku (W 174). (ii) Ko ngā kaiako pai, ko ngā mea whai manawa, kāore e tere hōhā i ngā mahi hē a ngā ākonga.

6. [Tāne] Te wāhi e noho ai, e toko ake ai te whakaaro, te kare ā-roto. Kātahi nā te kēmu tākiringa manawa, ko tērā.  hinengaro (1)

7. [Tāne] ing, āhua. Te kaha e akiaki ana i te tangata ki te mahi i tētahi mahi, kia mahia rānei tētahi mahi. E hiakai ana ahau, kāore aku manawa kōrero (W 174).

manawa kino [Ranginui & Papatūānuku] mahp, ing, āhua. Ka āhua mataku tonu i runga i te whakapono tērā ka pā he raru, he āhuatanga kino. E manawa kino ana au kei rutua te kuia e te ngaru.  manawapā (2)

manawa kino [Ranginui & Papatūānuku] Kāore e tau ngā whakaaro i runga i te whakapono tērā ka pā he raru, he āhuatanga kino. E manawa kino ana kei tae tōmuri atu rāua ki te taunga waka rererangi.  māharahara

manawa popore [Ranginui & Papatūānuku] Kāore e tau ngā whakaaro i runga i te whakapono tērā ka pā he raru, he āhuatanga kino. Kua manawa popore katoa ngā hōia i te kitenga i te mahi a te tamariki mate kai huri noa i a rātou.  māharahara

manawa rau [Ranginui & Papatūānuku] Kāore e tau ngā whakaaro i runga i te whakapono tērā ka pā he raru, he āhuatanga kino. Kei te manawa rau te tāne kei kore te wahine taumau e puta ake ki te whare karakia.  māharahara

manawa reka [Ranginui & Papatūānuku] Kua tatū te ngākau, te wairua me ngā whakaaro i te mea kua eke, kua tutuki ngā hiahia. Kātahi anō au ka manawa reka, ka riro mai hoki te utu o tōku kākahu (W 174).  ngata2

8. [Ranginui & Papatūānuku] ing. He kupu e tohu ana i te tangata e aroha nuitia ana. Ko ia taku manawa. Ki te hemo ia, ka hemo anō hoki ko au.  tau3 (3)

9. [Tāne] He taonga, he tangata, he aha atu rānei ko ia e kaha tautoko ana, e whakakaha ana i tētahi atu mea, ko ia tōna oranga. (i) Ko taku whaea taku manawa, taku pou tē whakangāueue. (ii) He ika, he manu anake te manawa o te iwi (W 174).  pou1 (2)

mānawa1

[Tāne] ing. He rākau kei waenga i te 50 henemita me te 15 mita te tupu i ngā paenga wai tai, he rau tuawhiti kōratarata a runga, he huruhuru te angamate, he hua kākāriki pōī te tupu, ka kitea ngā paiaka o te rākau nei e pihi ake ana i te paru ina takoto te tai. Avicennia marina. {paetai, waikure}

mānawa2

1. [Tāne] ing. Te matimati tuawhā o te ringaringa, o te waewae rānei. Ka hoatu te rīngi ki te mānawa o te ringa mauī, ka mārena rāua. {māpere}

2. [Tāne] Te matimati tino roa o te ringa.  tōroa

mānawa3

1. [Rongo] ing. He karakia hei whakaū i ngā painga kua hua mai ki te tangata, kua riro i te tangata.

2. [Ranginui & Papatūānuku] Te āhuareka, te ngata (o tētahi hiahia). I kitea te mānawa i ngā kanohi o te hunga i whiwhi ai i te moni tika mō ō rātou whenua raupatu.

3. ‑hia ‑tia ‑tanga [Tūmatauenga & Rongo] mahw, ing, āhua. Ka pā te reo o te tangata whenua ki te whakatau i te manuhiri; ka pā te reo o te manuhiri ki te whakautu. E tika ana anō kia āta mānawatia ngā rangatira kua tae mai nei ki tā tātou hui.  maioha

4. ‑tia [Tāne] thu. He kupu tū i te tīmatanga o te kōrero hei whakamihi, hei whakaatu rānei i te mīharo ki tētahi mahi.  He wā anō ka whakahāngūtia. (i) Mānawa te atawhai mōku! (W 174) (ii) Mānawa te taonga o te pā! (W 174) (iii) Mānawa i tae mai koe (W 174). (iv) Mānawa mai ai te putanga o te ariki (W 174). (v) Mānawatia te kai i pura ai te karu o Tahuaroa (W 174). (vi) Mānawatia te kapi a Puninga (W 174).