This countdown requires you to have the latest Flash player - you can download it here.

He aha te kupu e kimi ana koe i te ī-papakupu?

 
Te āhua o ngā kōrero ka takoto: poto    roa



hore1

[Tāne] kore. He kupu whakakāhore i ngā momo kōrero maha, tae atu ki ērā e tīmata ana ki te pūmau me te pūmahi. Ka kaha te whai mai o tētahi pūmuri pērā i te 'kau', i te 'rawa', i te 'anō', i te 'atu', i te 'ake' rānei. (i) Hore atu he kōtiro tino ātaahua pērā i a Hinekohu i roto o Aotearoa (Wh 15, 7). (ii) Hore he tangi, he auē; hore he wā mamae (KtKM 3, 2). (iii) Hore kau ā rāua nei kai, hore ā rāua nei aha (Wh 15, 7). (iv) Mai ake i tērā rā tae mai ki tēnei, hore kau tērā wheke kia puta mai (Wh 17, 3). (v) Hore kau ia e hiahia ana kia takatū mai rātou mōna te take (TTR 1, 118). (vi) Hore ake i rīpenetā mō ō rātou hara (HMa 6, wh4). (vii) Tērā rānei e tukua e ia āna i whakaputa mai ai i te whare whakapononga kia mate i te wai kore i te koraha? Hore rawa, hore noa iho (HMa 6, wh2).

hore2

1. ‑a ‑ngia ‑nga [Tūmatauenga] mahw, ing, āhua. Ka tango i te kiri, i te kahu whakawaho o tētahi mea. Me hore te tapeha o te heihei kia toe kau noa ko te kiko.  tīhore (1)

2. [Ranginui & Papatūānuku] āhua. Kua kore katoa atu te uhi e tika ana kia noho mai, kua noho tahanga. (i) Me whakahou ngā taea hore o tō waka kia kore ai koe e aituā i te rori. (ii) Kāore he paku mahana o tēnā poraka - kua hore. {hohore}

3. ‑nga [Ranginui & Papatūānuku] āhua, ing, mahp. Kāore e āta whakaaro, kāore rānei e mātau ki te mahi tika. He hore tēnei tangata, nā hoki tōna kata (W 60).  heahea2 (1)

hore3

[Papatūānuku] ing. He wāhi (pērā i te ana) ka noho hei okiokinga mō te kōiwi tūpāpaku. Kia taka te tau, kia pirau, kia takoto ko ngā iwi anake, ka kawe ai i ngā kōiwi ki te hore, arā, ki te toma, ki te wāhi tino tapu (W 60).  toma

hore4

[Tāne] ing. He manu iti noho wao, noho ngahere, noho ururua. Mohoua albicilla.  upokotea

hore5

[Tangaroa] ing. He taniwha weriweri, he taniwha whakamataku, he taniwha kai tangata, he auau pērā i te kurī, he noho wai engari he haere anō i raro i te whenua.  tuoro