ttwlogo

 

Te 14 o Mahuru 2011

He Pānui Pāpāho

Te Whakataetae Tuhinga Roa Tuatahi hei tohu i Te Rā o te Reo Māori

Ko te 14 o Mahuru te Rā o te Reo Māori. Hei whakanui i tēnei, nei rā te reo karanga o Te Taura Whiri i te Reo Māori ki te iwi, kia ngau te pene ki te tuhi mai i ō whakaaro mō ngā take matua e whakararu ana i tō tātou reo.

Haere ake nei, ka tū tēnei whakataetae tuhinga ia tau hei whakamihi, hei whakamānawa i ngā Kaiwhiri o ngā tau ki mua, i whakapau nei i ō rātou kaha ki te rangahau, ki te whakatakoto whakaaro, ki te tuhi hoki mō te reo Māori.

Hei tā te Tumuaki, a Glenis Philip-Barbara, “He huarahi tēnei e whakapuakina ai e te apataki reo Māori nui tonu, ākonga mai, pouako mai, matatau mai, tapepe mai, nō tuawhenua mai, nō taone nui mai; he aha ngā mea e akiaki ana i a rātou ki te whai i te reo; he aha ngā mea e whakararu ana i tā rātou whai i te reo. He take tino nui ēnei”.

“Mā te whakataetae tuhinga nei pea e kitea ai he māramatanga mō ēnei tūāhuatanga, hei āwhina i tā mātou ārahi i ngā mahi whakahou i te rautaki reo Māori.

E āhei mai ana te hunga Ākonga (13 - 18 ngā tau) me te hunga Pakeke (19+).
Kāore e āhei mai te hunga ko te tuhi kōrero tō rātou oranga, te hunga ka utua mō ā rātou tuhinga, te hunga kua tāia ā rātou mahi e tētahi kamupene tā, te hunga rānei e hokona ana ā rātou tuhinga.

Kei te ringa tuhi te tikanga mehemea ka tuhi a ia ki te reo Pākehā, ki te reo Māori rānei. Mō ngā Ākonga, kia 600-1500 ngā kupu, mō te hunga Pakeke, kia 1,000-3,000 ngā kupu.

Ka $1,000 te moni ki te toa o te wāhanga ki ngā Ākonga, ka $5,000 te moni ki te toa o te wāhanga ki te hunga Pakeke. Ka tukua anō he moni ki te hunga ka tuarua, ka tuatoru rānei i tēnā, i tēnā wāhanga.

Ka tukua hoki he moni ki te kura ka nui mai ōna whakaaro ki āna tuhinga roa, kaua mō te maha anake, engari mō te pai o ngā whakaaro ake o ngā kaituhi. Ka pānuihia ngā toa ā te marama o Hakihea 2011.

Me tae mai ngā tuhinga katoa i mua i te 5 o ngā hāora o te Wenerei, te 2 o Whiringa-ā-rangi 2011. Tukua mai ō tuhinga ā-īmēra, ā-pepa rānei, ka mutu me mātua waitohu ngā tuhinga e te kaituhi. Mō te roanga atu o ngā kōrero mō te kaupapa o te tuhinga, ngā paearu me ngā whakawhiwhinga, haere ki te paetukutuku a Te Taura Whiri i te Reo Māori: www.tetaurawhiri.govt.nz  
 

Ka mutu i konei

 

 

Whakapā mai ki a: Debra Jensen, 04 471 6725 or 027 231 4297 debra@tetaurawhiri.govt.nz 

 



 

     



Māori Language Week is made possible with the support of:

Te Taura Whiri i te Reo Māori – Māori Language Commission
Te Puni Kōkiri – Ministry of Māori Development
Te Kāhui Tika Tangata – Human Rights Commission