19 o Haratua 2008

 

Panui Papaho

Te reo Maori i roto i nga kainga - 500,000 haora

“Kua piki te mana, te mohio, me te whakamahia o te reo Maori i roto i nga kainga huri noa i te motu na runga i nga mahi papaho i nga hotaka Maori, te ki a Huhana Rokx, Kaiwhakahaere Matua o Te Taura Whiri i te Reo Maori.

I te ra nei, whakamanuhia ai tetahi kopaepae e whakanui ana i te whakapaunga putea mo te 500,000 haora ki runga i nga mahi papaho hotaka Maori. I whakaturia Te Mangai Paho i te tau 1993 ki te whakatairanga i te ao papaho Maori.

“Me mihi ra ki te hunga i parau i te huarahi mo te whakaoranga o te reo pera ki a Nga Tamatoa me Te Reo Maori Society, i tapae i te petihana e tono ana kia whakaakonga te reo ki roto i nga kura, ki te aroaro o te Whare Paremata i te tau 1972; Nga Kaiwhakapumau i te Reo, i tapae i te kereme Reo Maori i te tau 1985, i puta ai nga reo irirangi Maori me te ratonga whakaata Maori”, te ki a Huhana.

I puta te paho tuatahi o nga reo irirangi Maori, Te Upoko o te Ika, i te tau 1987. I tenei wa, kua 21 ke nga reo irirangi a-iwi e papaho ana i te reo Maori ki te motu e tae ai te reo ki te iwi i roto i nga kainga kia whai wahi ki roto i nga mahi o ia ra, ia ra.

“I te tau 2004, i whakamanuhia a Whakaata Maori me tona ano kawenga matua ki te kawe i te reo Maori ki roto i nga kainga kia whai wahi ano te reo ki roto i nga ngohe o ia ra, ia ra, me te awhina i te ahua o te tuku a-reanga o te reo, tetahi ahuatanga tino nui mo te whakaoranga o te reo”

“Ko te reo e korerohia ana i roto i te kainga ia ra, ia ra, tetahi reo e kiia ana kei te ora, me ta tatou titiro ki te ao papaho Maori hei whakatairanga i te kaupapa, whakanui me te whakamahi i te reo Maori i nga wa katoa i roto i nga kainga ki nga whanau” te ki a Huhana Rokx.
“He taonga ora te reo Maori mo nga tangata katoa o Aotearoa whanui, e noho ahurei ai tatou. Kei te whakanui te Wiki mo te Reo Maori i Te Reo i te Kainga, a, na te 500,000 haora hotaka reo Maori, kaha piki ai te rangona me te tu o te reo Maori ki roto i nga kainga katoa o Aotearoa.”


Tangata Whakapa:
Nicky Cockburn Birch
021 475 782
nicky@tetaurawhiri.govt.nz