1 o Hongongoi 2008

Panui Papaho

Kua mate te kuia rangatira, a Reiri Rose Henare

Kua mate a Reiri Rose Henare, te pouaru o Ta Hemi Henare, i tana kainga i Pukehau. E 96 ona tau.

No Ngapuhi, Ngati Whatua, Ngati Hine, Ngati Porou me Ngati Kahungunu a Reiri Rose a, i te whanautanga mai o Ta Hemi, ka noho taumau a ia ki a Reiri Rose, tae noa ki to raua moetanga i te tau 1933. E ono a raua tamariki ake, e rima a raua whangai.

E ai ki te korero, he wahine “Tino Maia Rawa Atu” a ia, a, neke atu i te 50 tau ia e tau tuara ana mo tana hoa tane. I whakaata mai ia i tona pumau ki nga kaupapa Maori pera ki tana tane, i pera ano hoki tana pumau ki nga mahi a Te Kohanga Reo.

Kua heke te kapua pouri ki runga i a Ngati Hine whanui i te ngaronga o Reiri Rose ina hoki, i ngaro atu hoki to ratou morehu kaumatua rangatira o te Hokowhitu Maori, a Tamati Paraone i mua ake nei,” te ki a te Kaiwhakahaere o Te Taura Whiri i te Reo Maori, a Huhana Rokx.

Ko Reiri Rose te mutunga o nga pouaru a tetahi Ngarahu o te Hokowhitu Maori – no tona matenga, kua kotia taua here ki tetahi momo ao, i tu ai nga kawai rangatira Maori, i puta ai tenei mea te manaaki i te iwi, i puta ai te ngakau mahaki me te ngakau atawhai ki to te Maori aronga ki te wa, i tu ai hei tauira mo te aratakitanga ka manawanuitia e nga reanga mo nga tau mutunga kore.

Ka takoto a Reiri Rose ki te Marae o Otiria ki Moerewa. Ka tu te karakia nehu a te Rapare, 3 o Hongongoi a, ka haria ki Motatau tanumi ai.

Ka mahue mai ko te tokorima o ona tamariki ake, tae noa ki a Erima Henare, te Toihau o te Poari o Te Taura Whiri i te Reo Maori. Ka nui te mihi, te tangi a te Poari, te Kaiwhakahaere me nga kaimahi whanui e whakaaro nui nei ki te whanau pani. Moe mai ra e te Kahurangi.

Ka mutu.

Contact:
Nicky Cockburn Birch
021 475 782
nicky@tetaurawhiri.govt.nz