21 Hongongoi 2008

He Panui ki te Hunga Papaho

Tenei Te Taura Whiri i Te Reo Maori te whakamanu i te i- papakupu tuatahi ki te reo Maori

He maha nga tau i te tuhinga, i te mahinga, engari i tenei po, ka whakamanutia e Te Taura Whiri i te Reo Maori te i-papakupu ipurangi tuatahi ma nga kaikorero matatau. Ka whakahaeretia te kaupapa e Parekura Horomia, Minita mo Nga Take Maori hei te 6 i te ahiahi, i te Horo Nui o te Whare Paremata.

Ko te i-papakupu nei te mea tuatahi o tona momo i te ipurangi whai muri i te tanga o Tirohia Kimihia, te papakupu Maori anake mo nga akonga wharekura. Ka noho te i-papakupu hei tuakana ki tenei pukapuka. Ka puta i roto ko nga kupu orite me nga kupu rereke o tena rohe, o tena rohe, a, ka kitea etahi o nga kupu nonanahi noa nei i whanau mai ai ki te ao, i roto i te reo. Te tumanako ka noho hei pukapuka whai take mo nga mahi whakaora i te reo Maori.

Kei te watea te papakupu i tenei wa i te pae tukutuku o Te Taura Whiri i te Reo Maori ki www.koreromaori.co.nz. Ka puta te papakupu a-ta katoa me nga pukapuka a-wharangi pepa i nga toa hei te marama o Hepetema 2008.

Ka tuhono ki etahi kaiwhakamahi puta noa i te ao i te whakamanutanga, ki Aotearoa, ki te ao nui tonu hoki tae noa ki te hono ki te komihana ki te whakamahi i n[ga momo mita. Otira ka tuhono atu ki Ranana, kia kitea ai te watea o te papakupu ki nga whenua katoa.

E ai ki a Huhana Rokx, Kaiwhakahaere Matua o Te Taura Whiri i te Reo Maori, “E kore e mutu nga mihi ki te hunga nana i awhina mai, i mahi nui hoki mo tenei i-papakupu, i roto i nga tau. He rauemi te i-papakupu a-ipurangi mo te hunga i tupu tahi mai me te reo, otira mo nga kaikorero tino matatau ki te reo. Hei whakapumau enei momo rauemi, ma te hunga tino matatau ki te korero i te reo, i te whakapikinga ake o te reo ki ona tino taumata.”


Ka mutu

Whakapa mai ki a:
Nicky Cockburn Birch
021 475 782
nicky@tetaurawhiri.govt.nz