9 Hongongoi 2008

He Panui ki te Hunga Papaho

 

Kua pupu ake te wairua whakataetae ki nga tohu mo te Wiki o Te Reo Maori

 

E nga iwi o te motu tena koutou katoa.

“Kaore he taringa, kaore he tirotiro, i enei tau tata kua timata te whakataetae mo nga tohu mo te Wiki o Te Reo Maori i nga marama tuatahi o te tau. Kaore hoki i tino rereke i tenei tau. Kua timata ke te taetae mai o nga waea ki Te Taura Whiri i te Reo Maori (Maori Language Commission) mai i nga ropu patapatai ki nga tikanga whakataetae mo te tau 2008”, e ai ki a Huhana Rokx, Kaiwhakahaere Matua o Te Taura Whiri i te Reo Maori.

No te ra nei i whakaputaina ai e Te Taura Whiri i Te Reo Maori nga paearu mo nga tohu, me te puka whakauru mo nga whakataetae o tenei tau. E iwa rawa nga wahanga inaianei; te hapori, nga kura, nga kura tuatoru me nga whare wananga, nga kaunihera a-rohe me nga whakahaere a-rohe, nga umanga, te kawanatanga a-motu, te whakaata, te reo irirangi me te pukapuka ta. I tua atu i tenei ka tapiritia mai he honore hou e kiia ana ko te Tohu mo Tetahi Kaitono Hou, a, ka ahei nga wahanga katoa kia uru ki te Tohu Matua.

Ko tenei te tau tuarima mo nga tohu o te Wiki o Te Reo Maori. He mea whakahaere tenei kaupapa na Te Taura Whiri i te Reo Maori me ona hoa o Te Puni Kokiri, o te Kahui Tika Tangata, o Te Komihana a-Whanau, me te Ropu Matua o Te Kohanga Reo, hei whakanui, hei whakamihi hoki i nga mahi auaha whakatairanga i te reo Maori, tetahi reo whai mana o Aotearoa.

“He mea ataahua te rongo i nga ahuatanga kua whakatinanatia ia tau huri noa i te motu, i roto i te Wiki i Te Reo Maori. Ina etahi o nga kaupapa o tau ke; ko te hoatu tohuto ki nga tohu tiriti i Tokoroa me Putaruru (South Waikato District Council; Raukawa Trust Board), ko te ako i nga ingoa Maori me nga tikanga mahi rongoa o nga rakau maori i te punanga rakau o nga kaimahi (Diagnostic Medlab, Tamaki-makau-rau), ko te tapa tohu reo Maori mo nga whare tumatanui, me te whakatu papa reo Maori i nga punanga a-rohe me nga wahi tapu.

Ka haere te wiki o te Reo Maori atu i te 21 Hongongoi, 27, a, ko te kaupapa matua mo 2008 ko "Te Reo i te Kainga - Maori Language in the Home." “Ko te tino kaupapa mo nga tohu Reo Maori kia tu, kia kokiritia te kaupapa! Ma to whainga wahi mai e puta ai he painga ki te reo Maori, he pikinga iti ano ki te taumata o te reo ora”, te ki a Huhana Rokx.


Ka whakapuakina te hunga ka whakawhiwhia ki nga tohu mo te Wiki mo Te Reo Maori a te Paraire, 12 o nga ra o Mahuru/Hepetema 2008. Ko te puka whakauru me nga paearu kei te pae tukutuku www.koreromaori.co.nz , ka taea hoki te kimi ma te whakapa atu ki a Catherine i catherine@tetaurawhiri.govt.nz , i 04 471 6730 ranei.

KA MUTU

Whakapa mai ki a:
Nicky Cockburn Birch
021 475 782
nicky@tetaurawhiri.govt.nz