21 Hongongoi 2008

He Panui ki te Hunga Papaho

Kei te whakanui i te ra tuatahi o te Wiki o Te Reo Maori

 

Ka rongo nga tangata o Poneke i te reo whakamihi me te ‘kia ora’ hei whakanui i te ra tuatahi o te Wiki o Te Reo Maori. Ka mihia te hunga haere tereina i te teihana o Poneke e Te Taura Whiri i te Reo Maori me ona hoa mo Te Wiki o Te Reo Maori, Te Puni Kokiri, Te Kahui Tika Tangata, Te Komihana a-Whanau, me te Ropu Matua o Te Kohanga Reo. Ka hoatu he pukapuka, Te Reo i te Kainga - Maori Language in the Home, kei roto nei etahi kupu whai take, etahi tohutohu, me etahi korero hei awhina i te hunga whai i te reo.

Ka powhiri hoki nga akonga me nga kaimahi o Te Whare Wananga o Te Upoko o Te Ika a Maui i nga kaimahi o Poneke i MannersMall/Cuba Mall, ma te hoatu hua rakau ki a ratou, ma te waiata, me te tohatoha i te pukapuka. Ka tae atu te Minita a Parekura Horomia, Minita mo nga Take Maori, ki nga wahi e rua, kia uru ai ia ki nga mahi whakanui.

E ai ki a Huhana Rokx, Kaiwhakahaere Matua o Te Taura Whiri i te Reo Maori “ko te kaupapa matua mo tenei tau ko “Te Reo i Te Kainga.” Kua piki haere te korero i te reo i o tatou kainga, otira kua tino piki i waenga i nga pakeke me nga tamariki. Ko te kaupapa matua i tenei tau he tautoko kau, he whakatenatena, he whakahihiko i te hinengaro o te iti o te rahi, kia haere tonu te reo Maori i o tatou kainga."

Ka huri ko nga whanau, nga whakahaere, nga tari Kawanatanga a-motu, a-rohe hoki puta noa i Aotearoa ki te whakanui, ki te whakatairanga hoki i te reo. E ai ki a Huhana Rokx "Kei te tino whakamiharo atu au ki te kaha o te iwi whanui tonu ki te whakanui i te reo, i Te Wiki o Te Reo Maori." E mea ana au me haere tonu nga mahi nei mo tetahi wa roa ke atu, penei i nga tohu reo-rua me te whakahua i te ‘kia ora’ i te waea. Ahakoa he aha te mahi, he wahi iti tera o te whakapiki i te noho o te reo Maori hei reo tino ora mo to tatou whenua."

Hei awhina i o mahi whakanui i te Wiki o Te Reo Maori titiro ki nga rauemi e watea ana i te ipurangi. Mo etahi atu whakaaro me nga tohutohu mo nga Tohu mo te Wiki o te Reo Maori, 12 Hepetema, ki te Hotera o Duxton, ki te Whanga-nui-a-Tara peka mai ki www.koreromaori.co.nz inaianei.


Ka mutu

Whakapa mai ki a:
Nicky Cockburn Birch